Bank Strike : आज अतवार के दिन खुलल रही देस के सरकारी बैंक, काल्ह से सुरू होई 3 दिन के हड़ताल

बिजनेस डेस्क। देस के सब सरकारी बैंक आ क्षेत्रीय ग्रामीण बैंक आज अतवार के दिने सामान्य दिन जइसन खुलिहें सs आ कामकाज होई। एकरा बाद सोमार से 3 दिन के बैंक हड़ताल सुरू होई। बैंक यूनियन 28 से 30 सितंबर तक माने सोमार, मंगर आ बुध के हड़ताल करे जा रहल बाड़ी सs।

3 दिन के हड़ताल के देखत आज अतवार के दिन बैंक खोले के फैसला लिहल गइल बा, ताकि आम लोग बैंकिंग से जुड़ल आपन जरूरी काम आसानी से निपटा सके आ ओह लोग के जादे परेसानी ना होखे।

UFBU बोलवले बा 3 दिन के देसव्यापी बैंक हड़ताल

बैंक कर्मचारियन के यूनियन यूनाइटेड फोरम ऑफ बैंक यूनियंस (UFBU) 28 से 30 सितंबर 2026 तक 3 दिन के देसव्यापी बैंक हड़ताल के एलान कइले बा। ई हड़ताल 26 आ 27 सितंबर के सनिचर आ अतवार के छुट्टी के ठीक बाद होखे वाला बा। अइसन में बैंकिंग कामकाज लगातार 5 दिन तक प्रभावित होखे के आशंका रहे। एकर सीधा असर आम ग्राहकन पs पड़ सकेला।

बैंक में लगातार 5 दिन कामकाज प्रभावित ना होखे आ लोग आपन जरूरी काम पहिलही निपटा लेवे, एह खातिर अतवार के दिने बैंक खोलल गइल बा।

RBI दिहलस बैंक शाखा आ करेंसी चेस्ट चालू रखे के मंजूरी

भारतीय रिजर्व बैंक (RBI) 27 सितंबर के सब बैंक शाखा, ऑफिस, ATM से जुड़ल शाखा आ करेंसी चेस्ट के चालू रखे के मंजूरी देलस।

वित्त मंत्रालय बुध के कहलस कि बैंक ग्राहकन के सुविधा आ कल्याण सरकार के प्राथमिकता बा। सरकार आ बैंक प्रबंधन यूनियन से प्रस्तावित हड़ताल टाले के अपील कइले बा। संगही जरूरी बैंकिंग सेवा बिना रुकावट जारी रहे, एह खातिर जरूरी डेग उठावल गइल बा।

अगिला हफ्ता बैंक में खाली 2 दिन होई काम

बुध, 30 सितंबर के हड़ताल के आखिरी दिन होई। एकरा बाद 1 अक्टूबर के सब बैंक फेर सामान्य तरीका से काम सुरू करी। 2 अक्टूबर के गांधी जयंती के मवका पs देसभर के बैंक बंद रही। 3 अक्टूबर के बैंक फेर खुली। एकरा बाद 4 अक्टूबर के अतवार होखे के चलते सब बैंकन के छुट्टी रही।

Read Also: Vinay Kumar VRS : डीजीपी विनय कुमार लेलें VRS, बनलें मुख्य सूचना आयुक्त, अइसन रहल बा एह आईपीएस अधिकारी के सफर