Balampur : एमपीयू में अंतर-महाविद्यालयीय भाषण प्रतियोगिता, नवहा लोग रखल विकसित भारत के संकल्प

72 प्रतिभागी लोग लिहल हिस्सा : कुलपति कहलें- सेवा भाव आ नवहा शक्ति से बनी विकसित भारत

बलरामपुर। माँ पाटेश्वरी विश्वविद्यालय, बलरामपुर में बियफे के सेवा संकल्प अभियान के तहत अंतर-महाविद्यालयीय भाषण प्रतियोगिता के आयोजन भइल। कार्यक्रम के संबोधित करत कुलपति प्रो. रविशंकर सिंह कहलें कि साल 2047 में आजादी के 100 साल पूरा होखे तक भारत के विकसित राष्ट्र बनावे के सपना आज के नवहा पीढ़ी के ऊर्जा आ संकल्प से साकार होई।

कुलपति कहलें कि भारत दुनिया के सबसे जादे नवहा आबादी वाला देसन में सामिल बा। एकरा से नवहन के सपना के भारत पs गंभीरता से विचार करे के जरूरत बा। भारत आध्यात्मिक आ सेवा प्रधान संस्कृति वाला देस हs, जहां मानव सेवा के सबसे ऊंच स्थान दिहल गइल बा। सेवा भाव के बदौलत भारतीय लोग कइयन गो असंभव काम के संभव कs के देखवले बा।

ऊ कहलें कि देस आज नया चुनौती आ संभावना के दौर से गुजर रहल बा। विकसित भारत के निर्माण में हर नागरिक के भागीदारी जरूरी बा। अइसन प्रतियोगिता से विद्यार्थियन में आपन बात रखे के कला, आत्मविश्वास, विचार करे के क्षमता आ सामाजिक जागरूकता के विकास होला।

प्रतियोगिता में देवीपाटन मंडल के 15 गो महाविद्यालय के कुल 72 प्रतिभागियन हिस्सा लिहल लो। एह दौरान प्रतिभागी सेवा, जुवा शक्ति, राष्ट्र निर्माण आ विकसित भारत के परिकल्पना जइसन विषय पs आपन विचार रखल लो। प्रतिभागी अपना भाषण के माध्यम से विकसित भारत के लक्ष्य हासिल करे में नवहन के भूमिका के प्रभावी ढंग से प्रस्तुत कइल लो।

कार्यक्रम के अध्यक्षता कुलपति प्रो. रविशंकर सिंह कइलें। देवीपाटन मंडल के उच्च शिक्षा अधिकारी प्रो. पवन कुमार मौर्य विशिष्ट अतिथि के रूप में मवजूद रहलें।

निर्णायक मंडल में एमएलके पीजी कॉलेज के बीएड विभाग के पूर्व विभागाध्यक्ष डॉ. अरुण कुमार सिंह, विश्वविद्यालय के पूर्व डीन आ आईक्यूएसी सेल के अंतरिम निदेशक डॉ. बी. पी. सिंह आ महामना राजकीय महाविद्यालय, श्रावस्ती के प्राचार्य डॉ. धर्मेंद्र कुमार गुप्त सामिल रहलें।

निर्णायक मंडल के मूल्यांकन के बाद घोषित परिणाम में माँ पाटेश्वरी विश्वविद्यालय के कुशाग्र सिंह पहिला स्थान हासिल कइलें। दूसरा स्थान श्री लाल बहादुर शास्त्री डिग्री कॉलेज, गोंडा के प्रीति देवी राव के मिलल। तीसरा स्थान किसान पीजी कॉलेज, बहराइच के अवंतिका मिश्रा हासिल कइली। जबकि चउथा स्थान एएनडी पीजी कॉलेज, बभनान के मानसी कैलाश नाथ पांडे के मिलल।

पांचवां स्थान रोहिनी शुक्ला महिला महाविद्यालय, बहराइच के प्रतिभागी हासिल कइली। एह पांच गो प्रतिभागियन में से तीन गो प्रतिभागी राज्य स्तरीय प्रतियोगिता में हिस्सा लेवे जाई लो।

ई कार्यक्रम विद्यार्थियन के आपन प्रतिभा देखावे के संगे-संगे सामाजिक आ राष्ट्रीय मुद्दन पs विचार करे के मवका देलस।

Read Also: सुथनी में कचरा से ‘सोना’ बनाई IOCL, जल्दिए शूरू होई 200 टन क्षमता वाला CBG प्लांट