लंदन। लेबर पार्टी के भीतर चल रहल राजनीतिक उथल-पुथल के बीच ब्रिटेन के प्रधानमंत्री कीर स्टारमर सोमार के प्रधानमंत्री पद से इस्तीफा दे देलें। उनकर इस्तीफा के संगे डाउनिंग स्ट्रीट में एगो आउर छोट कार्यकाल के अंत हो गइल।
पिछिला कुछ सालन में ब्रिटेन में प्रधानमंत्री के छोट-छोट कार्यकाल के सिलसिला देखे के मिलल बा आ अब कीर स्टारमर के नाम एह सूची में सामिल हो गइल बा।
डाउनिंग स्ट्रीट से जारी आधिकारिक बयान में स्टारमर बतवलें कि ऊ अपना फैसला के जानकारी ब्रिटेन के राजा के दे देले बाड़ें। ऊ साफ कइलें कि जब तक नया प्रधानमंत्री के चुनाव नइखे हो जात, तब तक ऊ पद पs बनल रहिहें।
स्टारमर इस्तीफा काहे देलें?
कइयन गो राजनीतिक झटका, घटत जनसमर्थन आ लेबर पार्टी के अंदर नेतृत्व बदले के बढ़त मांग के बाद पिछिला कइयन गो हफ्ता से स्टारमर के भविष्य पs सवाल उठत रहे। साल 2024 के आम चुनाव में लेबर पार्टी के भारी बहुमत दिलावे वाला स्टारमर कंजर्वेटिव पार्टी के 14 साल के शासन के अंत कइले रहलें।
सुरुआती समय में उनकर सरकार के जनता से अच्छा समर्थन मिलल, बाकिर बाद में अर्थबेवस्था के चुनौती, सार्वजनिक सेवा में गिरावट आ पार्टी के अंदर बढ़त मतभेद से सरकार पs दबाव बढ़ गइल।
ब्रिटेन के अगिला प्रधानमंत्री के बनी?
61 साल के कीर स्टारमर जुलाई 2024 में ब्रिटेन के 58वां प्रधानमंत्री बनल रहलें। चुनाव में जीत के बाद अपना पहिला संबोधन में ऊ अपना पूर्ववर्ती ऋषि सुनक के नेतृत्व आ मेहनत के तारीफ कइले रहलें।
स्टारमर देस में बदलाव ले आवे आ ठोस परिणाम देवे के वादा कइले रहलें, बाकिर अलग-अलग मोरचा पs आइल चुनौती के चलते आखिरकार उनका प्रधानमंत्री पद छोड़ देवे के फैसला लेवे के पड़ल।
अब सब केहू के नजर ब्रिटेन के अगिला प्रधानमंत्री के नाम पs टिकल बा। लेबर पार्टी के भीतर नया नेतृत्व चुने के प्रक्रिया सुरू होखे के संभावना बा।
