कठुआ। बसोहली के सेवा-दो जलविद्युत परियोजना में सीआइएसएफ कांस्टेबल के गोलीबारी में सहायक कमांडेंट समेत चार लोगन के मौत के घटना के पीछे पारिवारिक वजह सामने आइल बा।
बतावल जा रहल बा कि आरोपित कांस्टेबल के पत्नी सीआइएसएफ में तैनात बाड़ी आ ऊ आपन लेइका ड्यूटी प साथ ले आवत रहली, जबकि एकर मनाही रहे।
एही बात के लेके सहायक कमांडेंट के सामने शिकायत कइल गइल रहे। मंगलवार के एह मामिला में कांस्टेबल के सहायक कमांडेंट के सामने पेशी होखे वाला रहे। एहसे पहिले ही कांस्टेबल गुस्सा में आके सहायक कमांडेंट, सब-इंस्पेक्टर आ दू गो जवान के गोली मार दिहलस।
जम्मू के रहे वाली बाड़ी पत्नी
आरोपित के पत्नी जम्मू संभाग के सांबा जिला के रहे वाला बाड़ी। हालांकि अभीन घटना के कारण प उच्चाधिकारी खुल के कुछ ना कहत बाड़ें। कठुआ के बसोहली-माश्का इलाका में स्थित सेवा-दो जलविद्युत परियोजना में मंगलवार के ई घटना भइल रहे।
बुधवार के फॉरेंसिक टीम मौका प पहुंच के साक्ष्य जुटवलस। एह बीच, सीआइएसएफ महानिदेशक प्रवीण रंजन सीआइएसएफ के अधिकारी लोग आ कठुआ के एसएसपी मोहित शर्मा के साथे हिमाचल के चमेरा अस्पताल पहुंचलें, जहवा मृतकन के शव राखल गइल रहे। जम्मू-कश्मीर के बसोहली-माश्का इलाका हिमाचल से सटल बा। चारों घायलन के ओहिजे ले जाइल गइल रहे।
जवानन के पार्थिव शरीर भेजल गइल
ओहिजा, मृतकन के सलामी देला के बाद पार्थिव शरीर उनकर पैतृक निवास भेज दिहल गइल। सहायक कमांडेंट अंकित कुमार पांडेय उत्तर प्रदेश के अंबेडकर नगर, सब-इंस्पेक्टर लक्ष्मण सिंह हिमाचल प्रदेश के सोलन, हवलदार संजीव कुमार जम्मू के अखनूर के चौकी चौरा आ मोहम्मद रफीक जम्मू संभाग के डोडा जिला के गंदोह के रहे वाला रहले|
महानिदेशक सीआइएसएफ के यूनिट में एगो दरबार लगाके जवानन से बातचीत कइलें। सीआइएसएफ के अउरी आलाधिकारी लोग यूनिट में कैंप लगाके जवानन से बात कइलें। एह बीच, आरोपित सीआइएसएफ कांस्टेबल अभिदेश सिंह के सात दिन के पुलिस रिमांड प भेज दिहल गइल बा।
No comments yet. Be the first to comment!