Asian Games : भारतीय हॉकी टीम रचली इतिहास, मलेशिया के 5-1 से हराके पांचवीं बेर जीतल गोल्ड

एशियन गेम्स 2026: भारतीय पुरुष हॉकी टीम एशियन गेम्स 2026 में शानदार प्रदर्शन करत इतिहास रच दिहलस। फाइनल मुकाबला में भारत मलेशिया के 5-1 से हराके पांचवीं बेर एशियन गेम्स के हॉकी खिताब अपना नाम कर लिहलस। एह शानदार जीत के साथे भारतीय टीम लॉस एंजिलस 2028 ओलंपिक खातिर भी क्वालीफाई कर लिहलस।

शनिवार के गिफू प्रीफेक्चरल ग्रीन स्टेडियम में खेलल गइल फाइनल मुकाबला में भारतीय टीम शुरू से ही अपना दबदबा कायम रखलस। मलेशिया के टीम भारत के सामने बहुत देर तक टिक ना पवलस। भारत के खिलाड़ी लगातार हमला करत रहलें आ मैच के आखिर तक अपना बढ़त मजबूत करत गइलें।

अइसन रहल फाइनल मुकाबला

मैच के पहिला क्वार्टर में भारत के हरनप्रीत सिंह 11वां मिनट में गोल दाग के टीम के 1-0 के बढ़त दिलवलें। हालांकि, मलेशिया जल्दी वापसी करत 14वां मिनट में गोल करके स्कोर 1-1 कर दिहलस।

दूसरा क्वार्टर में भारतीय टीम फेर से आक्रामक खेल देखवलस। मैच के 23वां मिनट में गुजराज सिंह गोल करके भारत के 2-1 से आगे कर दिहलें। एह बढ़त के साथे भारत के आत्मविश्वास अउरी बढ़ गइल।

तीसरा क्वार्टर में भी भारतीय खिलाड़ी लगातार दबाव बनवले रखलें। 42वां मिनट में हार्दिक शानदार गोल करके भारत के बढ़त 3-1 कर दिहलें। मलेशिया के खिलाड़ी वापसी करे के कोशिश कइलें, बाकिर भारतीय डिफेंस आ गोलकीपिंग के सामने उनकर कोशिश सफल ना हो सकल।

चौथा क्वार्टर भारत खातिर अउरी शानदार रहल। 54वां मिनट में शिलानंद गोल करके स्कोर 4-1 कर दिहलें। मैच के 57वां मिनट में कप्तान हरमनप्रीत सिंह एक अउरी गोल दाग के भारत के जीत लगभग तय कर दिहलें। फुल टाइम के सीटी बजला पर स्कोर भारत 5 आ मलेशिया 1 रहल।

पांचवीं बेर भारत बनल एशियन गेम्स चैंपियन

भारतीय पुरुष हॉकी टीम एह जीत के साथे एशियन गेम्स में पांचवीं बेर गोल्ड मेडल जीते में सफल भइल बा। भारत पहिला बेर 1966 में बैंकॉक में एशियन गेम्स हॉकी के खिताब जीतले रहल। एकरा बाद 1998 में फेर बैंकॉक में भारत चैंपियन बनल।

साल 2014 में इंचियोन में भारतीय टीम गोल्ड मेडल जीतलस। एकरा बाद 2023 में हांगझोऊ एशियन गेम्स में भी भारत खिताब अपना नाम कइलस। 2026 में भारत डिफेंडिंग चैंपियन के रूप में मैदान में उतरले रहे आ अपना खिताब के सफलतापूर्वक बचा लिहलस।

एह जीत के सबसे खास बात ई रहल कि भारतीय पुरुष आ महिला, दुनु हॉकी टीम एशियन गेम्स 2026 में गोल्ड मेडल जीतली। महिला टीम भी अपना खिताब जीत के लॉस एंजिलस 2028 ओलंपिक खातिर क्वालीफाई कर लिहले बिया। एह तरह भारतीय हॉकी खातिर ई एशियन गेम्स ऐतिहासिक उपलब्धि बन गइल बा।