Dupahiya 2 Review: ‘झा’ परिवार के दुश्मन बनल ‘धड़कपुर’, दोगुना ट्विस्ट आ टर्न के साथे लौट आइल दुपहिया

वेब सीरीज: दुपहिया सीजन 2

ओटीटी प्लेटफॉर्म: एमएक्स प्लेयर (अमेजन)

कलाकार: गजराव राव, स्पर्श श्रीवास्तव, भुवन अरोड़ा, रेणुका शहाणे, दिनेश लाल यादव (निरहुआ), शिवांगी रघुवंशी

निर्देशक: सोनम नायर

रेटिंग: 3/5

एंटरटेनमेंट डेस्क, नई दिल्ली। पिछिला साल रिलीज भइल लोकप्रिय वेब सीरीज दुपहिया अपना नया सीजन के साथे ओटीटी प फेरु वापसी कर चुकल बा। धड़कपुर गांव एह बेर एगो रोमांचक कहानी के साथे हंसावे आ गुदगुदावे खातिर लौट आइल बा। एह आधार प हम रउआ सभे के दुपहिया सीजन 2 के रिव्यू बतावे जा रहल बानी कि ई सीरीज पइसा वसूल बा कि ना।

का बा दुपहिया सीजन 2 के कहानी

अब बात करीं दुपहिया सीजन 2 के कहानी के, त एह बेर धड़कपुर गांव में रहे वाला झा परिवार के सभे सदस्य अपना-अपना परेशानी से जूझत बाड़ें। परिवार के मुखिया मास्टर बनवारी जी (गजराव राव) अपना खेत में मोबाइल टावर लगावे के प्लान बना रहल बाड़ें, बाकिर पूरा गांव एकर विरोध में बा।

दूसर ओर परिवार के बेटी रोशनी (शिवांगी रघुवंशी) अमावस (भुवन अरोड़ा) के साथ मिल के एसएससी (SSC) के परीक्षा पास करे खातिर पेपर लीक करावे के जुगाड़ लगावत बाड़ी। फेरु आवत बा परिवार के इकलौता चिराग भूगोल (स्पर्श श्रीवास्तव), जे फिल्म स्टार बने के सपना देखत बा।

बाकिर जइसन-जइसन सीरीज आगे बढ़त बा, ओइसन-ओइसन एगो अइसन संदेश सामने आवेला, जवन आज के दौर में नकल माफियन के चलते हुनरमंद छात्र-छात्रन के साथ हो रहल नाइंसाफी के घिनौना खेल के दर्शावेला।

झा परिवार के एह सभे सदस्यन के समस्या के समाधान के इर्द-गिर्द दुपहिया सीजन 2 के कहानी घूमत बा। कॉमेडी, इमोशनल ड्रामा आ रोमांच के दम प एकर कहानी बढ़िया असर छोड़त नजर आवेला। लेखक अविनाश द्विवेदी आ चिराग गर्ग बड़ मजेदार आ सटीक तरीका से एकर कहानी के 8 एपिसोड में गढ़ले बाड़ें। सीरीज में एह बेर हंसी के ठहाका से जादे रोमांच नजर आवत बा, जेकरा चलते ई देखे लायक बन गइल बा।

नया किरदार असरदार

दुपहिया सीजन 2 में कई गो नया किरदारन के एंट्री भइल बा। एहमें भोजपुरी सुपरस्टार दिनेश लाल यादव (निरहुआ) के नाम शामिल बा। दुपहिया 2 में ऊ एगो प्रतियोगी परीक्षा के संचालक आ मास्टर (प्रथम बाबू) के किरदार में नजर आवत बाड़ें, जे पेपर लीक करावे के घोटाला करत बाड़ें।

उनकर किरदार काफी अहम आ दिलचस्प बा। एकरा अलावा मोबाइल टावर कंपनी के एजेंट शीतल के रोल में अभिनेता सूर्यांशु मिश्रा भी बढ़िया आ असरदार नजर आइल बाड़ें। एकरा अलावा सीरीज के पुरान कलाकारन एह सीजन में अपना दमदार अभिनय के लोहा मनववले बाड़ें।

सटीक डायरेक्शन

सीजन वन के तरह दुपहिया के सीजन 2 के कंटेंट के नब्ज निर्देशक सोनम नायर बखूबी समझले बाड़ें आ सीरीज के नया सीजन के सार तैयार कइले बाड़ें। एह बेर दुपहिया 2 में काफी कुछ अलग देखे के मिलल बा, जे धड़कपुर गांव के पूरा काया पलट कइ देला। स्क्रीनप्ले के ध्यान में रखत सोनम दुपहिया सीजन 2 के वास्तविकता के पृष्ठभूमि पर उतारे के पूरा कोशिश कइले बाड़ें।

फाइनल वर्डिक्ट

अगर रउआ के दुपहिया के पहिला सीजन पसंद आइल रहे, त यकीनन सीजन 2 भी रउआ के दिल छू ली। धड़कपुर में एह बेर अइसन बहुत कुछ देखे के मिलल बा, जे शायद केहू सोचले भी ना रहे। अइसन में अगर रउआ कॉमेडी-ड्रामा सीरीज देखे के शौकीन बानी, त यकीनन रउआ के दुपहिया 2 पसंद आई।